Skip to main content

CHTh yn cefnogi agoriad swyddogol canolfan gymunedol newydd gyffrous yn Llandudno

Dyddiad

Dyddiad
FoMS

Agorodd adnodd cymunedol newydd ei ddrysau yn swyddogol yn ardal Penmorfa (West Shore), Llandudno ddydd Gwener 24 Ionawr gyda'r nod o ddarparu cartref i grŵp gweithredu cymunedol lleol, man lle gall pobl ifanc fynd i ddysgu sgiliau newydd a chwrdd â ffrindiau, a 'Chanolfan Glyd' i bawb yn ystod y tywydd oer. Mae Comisiynydd Heddlu a Throsedd Gogledd Cymru, Andy Dunbobbin, yn cefnogi agor y ganolfan a'i nod o wasanaethu'r gymuned leol er mwyn brwydro yn erbyn ymddygiad gwrthgymdeithasol yn y dref.

Mae'r ganolfan wedi'i lleoli mewn hen siop ar gornel Heol Alexandra a Heol Bryniau wrth ymyl Pont Maesdu ac mae wedi'i sefydlu gan y grŵp gwirfoddol lleol, Cyfeillion Stryd Mostyn (Friends of Mostyn St), a'u hadran ieuenctid, FoMS Kidz, sydd â llawer o aelodau ifanc yn dod o'r gymuned leol. Sefydlwyd Cyfeillion Stryd Mostyn ym mis Ebrill 2023 gyda'r nod o gyflwyno gweithgareddau yng nghanol tref Llandudno fel casglu sbwriel, paentio, garddio, gofalu cyffredinol a digwyddiadau cymunedol. Roedd teimlad cryf yn yr ardal y dylai pobl ifanc hefyd deimlo eu bod yn rhan o’r dref ac yn rhan o waith y grŵp, ac roedd llawer hefyd yn dymuno dangos faint maent yn gwerthfawrogi ac ymfalchïo yn eu cymuned. Felly, crëwyd FoMS Kidz ym Mhenmorfa i gefnogi gwaith Cyfeillion Stryd Mostyn o amgylch y dref. Ers hynny, mae dwsinau o'r bobl ifanc dan sylw wedi cymryd rhan yn rheolaidd yn casglu sbwriel ac yn gwneud gwaith cymunedol arall i helpu i gadw eu cymuned yn edrych fel pin mewn papur.

Bydd y ganolfan newydd yn gweithredu fel canolfan ar gyfer gwaith FoMS Kidz yn y gymuned a bydd hefyd yn cynnig lle ble gall y bobl ifanc gwrdd o dan oruchwyliaeth a mwynhau treulio amser gyda ffrindiau. Y gobaith yw y bydd hyn hefyd yn darparu gweithgareddau dargyfeiriol i unrhyw bobl ifanc a fyddai fel arall heb unrhyw beth i'w wneud ac, efallai, yn mynd i drafferthion.

Mae'r prosiect wedi bod yn bosibl drwy ymdrechion ar y cyd rhwng FoMS Kidz a Ffrindiau Stryd Mostyn, ynghyd ag arian a godwyd yn ystod y prosiect The Longest Yarn & More ym mis Hydref pan fu miloedd o bobl yn ymweld ag arddangosfa yn Eglwys y Drindod Sanctaidd yn Stryd Mostyn o olygfeydd o D-Day a grëwyd drwy ddefnyddio gwlân. Yn ogystal, mae Go North Wales, mewn partneriaeth â Holidaycottage.co.uk, ac Asda wedi rhoi cyfraniad hael i gefnogi FoMS Kidz a chreu'r cyfleuster, sydd hefyd yn cael ei gydnabod fel Canolfan Gynnes gan Gyngor Bwrdeistref Sirol Conwy. 

Dywedodd Clara-Rose Molloy, Cadeirydd FoMS Kidz: "Mae canolfan FoMS Kidz yn bodoli oherwydd gwirfoddolwyr ymroddedig, sy'n rhannu fy ngweledigaeth o greu lle diogel i blant ymfalchïo yn eu tref wrth ddysgu, tyfu a mwynhau bod yn blant. Gyda chefnogaeth amhrisiadwy busnesau lleol, rydym yn adeiladu dyfodol mwy disglair ac yn mynd i'r afael ag ymddygiad gwrthgymdeithasol gyda'n gilydd."

Dywedodd Ginis Rivers o Gyfeillion Stryd Mostyn: "Mae Cyfeillion Stryd Mostyn yn falch iawn o'n pobl ifanc, eu teuluoedd a'u hymdrechion i fynd i'r afael â stigma ac ymddygiad gwrthgymdeithasol trwy wasanaethu'r gymuned a chreu gweithgareddau hwyliog. Nid clwb ieuenctid yw hwn, ond lle diogel a chynnes lle gall ein pobl ifanc ddysgu sgiliau a magu hyder. Rydym wedi ymrwymo i gefnogi'r bobl ifanc yn eu hymdrechion ac rydym yn gobeithio y bydd y ganolfan yn adnodd cymunedol gwerthfawr sydd ar gael ar gyfer yr ardal ehangach."

Dywedodd Andy Dunbobbin, Comisiynydd Heddlu a Throseddu Gogledd Cymru: "Mae'n bleser cefnogi agor canolfan newydd FoMS Kidz a chlywed am ymroddiad y gwirfoddolwyr a'r gweithredwyr sydd wedi gwneud y prosiect hwn yn bosibl. Rwyf wedi cael fy syfrdanu gan benderfyniad pawb a gymerodd ran i greu rhywbeth gwerthfawr i bobl leol a'r balchder y maent yn ei ddangos yn eu cymuned. Mae'r ffaith bod pobl ifanc yr ardal wedi dangos cymaint o frwdfrydedd dros wirfoddoli yn eu cymuned leol ac am sefydlu'r canolbwynt hwn fel canolfan ar gyfer eu gweithgareddau yn wych i'w gweld ac yn esiampl i lawer o gymunedau yng Ngogledd Cymru. Fel Comisiynydd, rwy'n credu ei bod yn bwysig cydnabod y cyfraniad y mae'n rhaid i'n pobl ifanc ei wneud, a pha mor benderfynol y mae llawer ohonynt i weld eu cymunedau'n daclus ac yn cael eu cadw'n dda, yn rhydd o droseddu ac ymddygiad gwrthgymdeithasol ac yn croesawu pawb."

I ddysgu mwy am Gyfeillion Stryd Mostyn, a FoMS Kidz, ewch i: sexualviolencesupport.co.uk